NAGA CITY- Liwat na nangapudan an City Veterinary Office sa siyudad nin Naga sa publiko orog na sa mga pet owners na magin responsable.
Ini an makalihis na igwang mga basay-basay na mga Ido an nadakop asin pigdara sa City Animal Pound Facility.
Sigun sa City Veterinary Office, an mga nasambitan ng Ido an nakua gikan sa manlaen-laen na lugar o barangay sa siyudad.
Katakod digde, pinakadakol sa mga nadakop an gikan sa Barangay Cararayan asin Calauag na igwang pig pitong Ido.
Duwa man sa Barangay Balatas mantang pigsararo sa Barangay Dayangdang, Pacol asin San Isidro. Marurumduman, enot nang nangapudan an nasambitan ng opisina sa mga pet owners na pangatamanan nin marhay an saindang mga atamang hayop.
Nagigin peligroso soboot kaya an mga basay-basay na hayop orog na sa komunidad na minsan nagigin kawsa pa kan aksidente asin pigpupuonan kan mga kaso nin rabies.
Kaya apwera sa padagos na pagdadakop kan mga ini padagos man an pagkundusir nin anti-rabies vaccination sa mga atamang hayop tanganing magin salbado an publiko sa peligrong dara kan mga ini.
Mientrastanto, sa mga mawot man na mag-adaptar, magpasiring soboot sa Animal pound sa Barangay Carolina kun saen bukas an pasilidad puon Lunes hasta Domingo puon alas 8 nin aga hasta alas 4 nin hapon.
