NAGA CITY – Pigtawan doon kan Naga City Youth Mayor an dakulang ambag kan mga jovenes sa marhay na futuro kan siyudad nin Naga.
Sa nagin patara-tara ni Bridget Kyle Bernal, City Youth Mayor, sinaysay kaini na kasabay kan pagkomemorar kan ika-39 na taong anibersaryo kan EDSA People Power Revolution, dae nagin tuninong an mga jovenes sa pagtatanggol sa kalayaan.
Enot na digdi an pagbali kan mga jovenes sa eleksyon tanganing ipahiling na igwa nin pakiaram asin igwa nin pakinabang an mga jovenes.
An mga jovenes man soboot an nangengenot sa Digital Activism sa paagi kan social media, piglalantad an mga katiwalian, pigpapakusog an laban kontra sa mga salang impormasyon, asin pinaglalaban an derichos humanos.
Aktibo man an mga jovenes sa mga makabuluhang adbokasiya asin nag-aatendir sa matuninong na hiro protesta.
Jovenes man an nagsasalungat sa mga historical revision na nagtatao nin duon, na muklat sinda sa reyalidad asin pagtatao nin importansya sa mga tawong nagtatao nin kalayaan na naeeksperyensiyahan ngunyan.
Ini an nagpapahiling kan dakulang ambag kan mga kajovenan para sa marhay na futuro bako sana para sa siyudad alagad para sa nasyon.
