NAGA CITY-Piglinaw kan Civil Service Commission Camarines Sur an mga panundun mapadapit sa pagheras nin eligibility sa mga SK Official.
Sa entrevista kan Bombo Radyo Naga ki Ma. Dolores Deteras Salud, Director kan CSC Field Office, sinaysay kaini na kinakaipuhan na magpasiring sa saindang opisina an mga mawot magkua nin eligibility tanganing ma-review an mga requirements.
Piglinaw man kan opisyal na dae boot sabihon SK Official, matatawan tulos nin eligibility.
Tanganing makua soboot ini, kaipuhan nakatapos nin 3 year full term service kun saen mapuon sa 2018 hasta 2022 an matatawan.
Dugang pa ni Salud, an nasambitan ng panundon an maagi sa manlaen-laen na proseso siring kan evaluation asin interview.
An eligibility na ini iyo an katampad kan saindang pagserbisyo sa saindang Barangay asin dae ini nakadepende sa edad.
Marurumduman, basado sa CSC Resolution No. 2500752, o Rules Governing the Grant of Eligibility to SK Officials na pigtulod kan nakalihis na Hulyo 24, 2025, an mga SK official na nakapagsirbi nin bilog na tolong taong termino o katampad kaini pwedeng pagkalooban nin Sangguniang Kabataan Official Eligibility (SKOE).
An SKOE an katampad kan eligibility para sa first-level positions sa career service, apwera sa mga posisyong sakop kan board laws o nangangaipuhan nin espesyal na eligibility.
An nasambitan ng prebelihiyo an para sa mga duly elected asin appointed SK officials, na kun saen nagbibisto sa vital role kan kajovenan sa nation-building asin pigtawan pusog an kontribusyon sa serbisyo publiko
