NAGA CITY- Padagos an paglilinig asin paghali kan mga tambak na basura na winalat pa kan Bagyong Kristine sa may parte kan Barangay Mabolo, Naga City.
Sa entrevista kan Bombo Radyo Naga ki Arthur Matos, Kapitan kan Barangay Mabolo, Naga City, sinaysay kaini na nagpakol na sa haros sarong semana an saindang paglilinig sa tabang kan ibang mga organisasyon asin mga personalidad.
Sigun sa opisyal, kaipuhan an padagos na paglilinig tangani na makalikay sa helang an mga residentes na kawsa kan mabatang parong na gikan sa mga basura.
Sa ibong man na lado, mayo pa soboot suplay nin bulong na nag-aabot sa Barangay Mabolo alagad an pangangaipuhan digde an nasisimbagan sa paagi kan pigkukundusir na medical mission siring na sana kan Angat Buhay na pinamamayuhan ni Atty. Leni Robredo.
Dakulang katabangan soboot an nasambitan ng aktibidad nin huli ta kadakol na mga residentes sa saindang lugar an nangangaipuhan kaini sa presente.
Imbes kaya na bakalon, magagamit pa kan mga tawo an saindang kwarta sa iba pang pangangaipo orog na sa liwat na pagbuhat gikan sa nagin epekto kan Bagyong Kristine.
