NAGA CITY- Pigkukundusir kan MDRRMO Lagonoy an close monitoring sa Coastal Barangay asin flood prone area sa saindang banwaan katakod kan Bagyong Wilma.
Sa entrevista kan Bombo Radyo Naga ki Rommel A. Batanes- Team Leader, LDRRMO kan banwaan nin Lagonoy, sinaysay kaini na mahigot an saindang nagigin pagbantay tanganing tolos na makapagresponde sa panahon kan kalamidad.
Sigun pa ki Batanes, kasuudma pa sana, nag-abiso na sinda sa mga barangay na i-monitor an saindang mga nasasakupan orog na ta padagos na nakakaeksperyensiya nin pag-uran an saindang lugar.
Katakod kaini, pigsaysay kan opisyal na mayo pa man nairehistro na pigbabahang barangay sa saindang banwaan maski dagos-dagos an pag-uran na nararanasan.
Siringman, mayo pa man nairehistro na na-stranded na pasahero sa saindang lugar na ipinagpapasalamat kan opisyal.
Sa ngunyan, padagos an saindang pag-enkaminar sa saindang mga nasasakupang residente tanganing malikayan an mga casualties sa panahon kan kalamidad.
