Arestado sa Pampanga an saro pang suspek na embwelto soboot sa kasong qualified trafficking in persons kontra ki dating Presidential Spokesperson Atty. Harry Roque asin Cassandra Ong.
An suspek binistong na si “Mariano,” saro sa 49 na co-accused ninda Roque asin Ong.
Sigun sa Criminal Investigation and Detection Group (CIDG), inarestar si Mariano sa Clark, Pampanga kan Sabado.
Si Mariano an saro sa mga security guard na naka-duty kan mangyari an soboot trafficking sa Lucky South 99 Outsourcing Inc., sarong Philippine Offshore Gaming Operator (POGO) sa Porac, Pampanga.
Pinamayohan ni CIDG Director Police Major General Nicolas Torre III an iba pang mga co-accused na nagsuko na huli ta padagosw an operasyon kan mga tracker teams na nagha-hanap sa sainda.
Marurumdoman, na an mga arrest warrant kontra ki Roque, Ong, asin ibapang embwelto sa krimen an pig-isyu kan Regional Trial Court kan Angeles City kan Mayo 15, 2024.
Enot na digdi, kan Mayo 22, nadakop man si “Marlon,” saro pang co-accused, sa sarong entrapment operation sa Mabalacat City, Pampanga.
Mientrastanto, pinahimutikan ni Roque an mga alegasyon asin sinabi na dae ini naging abogado kan anuman na ilegal na POGO asin bako man ini an abogado kan Lucky South 99.
Sigun ki Roque, pig-ibahan sana kaini si Ong sa sarong meeting nin huli ta huna kaini, biktima ini kan estafa.
Si Roque an presenteng naghahagad nin asylum sa Netherlands.
