Pigbuyagyag kan Commission on Audit o COA an apat na bagong kaso kan soboot ‘ghost projects’ na nagkakantidad nin poco mas o menos P350 milyon, katakod kan mga flood control project sa irarom kan Department of Public Works and Highways o DPWH – Bulacan 1st District Engineering Office.
Sigun sa fraud audit kan COA, tinukoy na an mga proyektong ini pigkokonsiderar na tapos na, alagad kan inspeksiyunon nahiling na mayong nakatindog na istruktura o kaya man substandard an pagkakagibo.
Kaibahan sa mga contractor na imbwelto iyo an SYMS Construction Trading, na igwang duwang proyektong flood control sa Baliuag asin Pulilan, alagad parehong dae nanutaran sa mismong site.Kaibahan man sa mga imbwelto iyo an Topnotch Catalyst Builders Inc. para sa sarong riverbank protection project sa Plaridel, na mayo mang aktwal na ebidensiyang igwang proyekto sa lugar.
Siring man an Triple 8 Construction and Supply Inc., para sa riverwall project sa Barangay Pagala, Baliuag, na sigun sa COA, harayo sa nakaysay na completion date.
Marurumdumang enot nang idinawit sa paninimbagan an DPWH-Bulacan 1st District Engineering Office kaibahan sinda District Engineer Henry Alcantara, Assistant District Engineer Brice Hernandez, asin nagkapirang iba pang engineers.
Kaibahan man an mga may kansadiri asin opisyal kan nasambitan ng mga construction firms.
Pwedeng kahampangon kan mga dating opisyal an mga kasong graft, malversatioon, asin falsification of documents.
