Nagrekomendar an Commisson on Audit nin mas mahigot na mga lakdang, kaibahan na an pagpugol kan suweldo asin pagpataw nin mga padusa kontra samga opisyal kan Department of Education (DepEd) na dae nakapag-liquidate kan cash advances (CAs) na nagkakantidad nin P6.96 bilyon kan nakalihis na Disyembre 31, 2023.
Sa saindang 2023 Annual Audit Report, pigbuyagyag kan COA an kabiguan kan DepEd na magsunod sa mga ley asin regulasyon na nagreresulta sa akumulasyon kan mga dae nalilinaw na CA.
Kaiba sa mga pangenot na kakulangan an pagtatao nin mga CA nin mayong tamang otoridad, pagbabalyo kan mga pondo sa tahaw kan mga accountable officers (AOs), kabiguang mag-bond kan mga AO nin marhay, asin pagbabayad kan mga gastos siring kan Service Recognition Incentives (SRI) sa paagi kan mga CA imbes na direktang pagbayad.
Basado sa report, an mga nangengenot na rehiyon na igwang pinakahalangkaw na unliquidated balances, iyo an:
Region VII (Central Visayas) : 1.31 billion
Region VIII (Eastern Visayas): 1.01 billion
Region XII (SOCCSKSARGEN): 819.4 million
Region IX (Zamboanga Peninsula): 537.1 million
Region VI (Western Visayas) : 513.9 million
mantang sa NCR (National Capital Region): 301.9 million.
Tanganing masimbagan ini, pigrekomendar kan COA an mga minasunod:
Punduhon an pagtatao nin mga bagong cash advance sa mga opisyal na igwang nakabinbin na balanse.
Mag-isyu nin demand letters sa mga aktibong empleyado tanganing maobligar an pagliquidate
Pugulan an sweldo asin dapat bayadan kan mga delingkwentong AO hasta sa mabayadan an mga obligasyon.
Magpataw nin mga padusa sa irarom kan mga panundon kan Civil Service Commission (CSC) para sa pagkaantala.
Nasambitan man sa report na sa pirang mga kaso, igwang kaibang mga natatadang balanse sa mga accountable officers na nagretiro, nagbutas, nag-AWOL,o nagbalyo na orog na nagpapakwalipikado sa proseso kan pagbawi.
