Temporaryong sinarado an Colosseum sa Roma, Italya matapos makalihis asin magadan an sarong 22-anyos na teknisyan mantang nagbubugtak nin bagong sistema nin ilaw sa laog kan suanoy na arena.
An teknisyan nakuang natumba nin mga 10 metros asin nagadan dahil sa insidente. Bilang paggalang sa nagadan na empleyado, nagboot si Italian Culture Minister Alessandro Giuli na palawigon an pagsara kan parte kan Colosseum Archaeological Park kun saen nangyari an insidente.
Segun ni Giuli na sinda nabigla asin dai makapaniwala sa nangyari. An parte kan ikaduwang tier kan Colosseum magdadanay na sarado tanganing magkaigwa nin pagmondo asin para sa imbestigasyon sa insidente.
An Colosseum sarong bantog na atraksyon nin mga turista asin midbid bilang pinakadakulang ampiteatro kan Imperyo Romano. Itinogdok ini mga 2,000 na taon na an nakaagi asin ginibo hadton panahon bilang lugar nin mga laban nin mga gladyador, mga paggadan asin pag’ayam nin mga hayop.
