NAGA CITY- Kinumpirmar ngonian kan 2nd Infantry Division (ID), Philippine Army (PA) na nasa marhay na kamugtakan na an duwang soldados na nairido sa magkasunod na engkwentro sa pagultanan kan pwersa kan gobyerno asin pinagtutubudang rebeldeng New People’s Army (NPA) sa Balayan, Batangas.
Sa eksklusibong entrevista kan Bombo Radyo Naga ki Capt Patrick Jay Retumban, Division of Public Affairs Office (DPAO) chief kan 2ID, sinaysay kaini na harayo na sa ano man na peligro an duwang soldados na nairido sa nasambitan nang engkwentro.
Segun ki Retumban, nagkukundusir nin security patrol an 202nd Infantry Brigade sa Sitio Kapihan Barangay Patugo kan maka-bakbakan an grupo nin NPA.
Nagdurar nin haros 30 minutos an riribayan nin putok sa pagultanan kan duwang lado kun sain, nagwalat nin mga mantsa nin dugo sa encounter site an mga rebelde.
Dugang pa ni Retumban, nagdurulag an mga rebelde sa enot kaining engkwenro sa tropa kan mga soldados alagad nasabatan man kan mga ini an blocking groups na nagresulta sa saro pang engkwentro na nagdurar nin maabot sa sarong oras.
Katakod kaini, sa ngonian, nagpapadagos an saindang mga combat operations tangani na masiyerto an seguridad kan mga residente sa lugar.
Mientrastanto, padagos pang pig-aaram kun igwang nairido sa lado kan kalaban.
Dugang pa kan opisyal, mga natatadang miembros kan Sub Regional Military Area (SRMA) 4C an mga nakalaban kan militar sa bakbakan.
Kun marurumduman, nagadan an 15 miembros kan SRMA sa engkwentro sa Nasugbu, Batangas kan Nobyembre 18, 2017 kun sain nakumpiskar man an 13 armas.
