NAGA CITY- Pigreport kan Commission on Elections Bicol na nakareseber ini nin nasa 44,630 voters’ registration applications puon Agosto 1 hasta 3.
Sigunn ki Comelec-Bicol Director Maria Juana Valeza, mahihiling soboot an halangkaw na interes kan mga jovenes sa pagparehistro asin pagpartisipar sa Barangay asin Sangguniang Kabataan election.
Marhay soboot ining sinyales sa kamawotan kan mga kajovenan na magpartisipar sa demokratikong proseso kan pagpaparehistro asin pagpartisipar sa ikukundusir man na eleksyon.
Katakod digde, pigsaysay kan opisyal na kadalan sa saindang mga nareseber na aplikasyon iyo an new registrations, corrections of entries, reactivations, asin changes or corrections in voters’ records.
Mientrastanto, an probinsiya kan Camarines Sur an igwang pinakahalangkaw na nakapagregistro nin bakong registrant na mapakol sa 12,922, pigsundan kan Albay na igwang 12,373, Masbate na igwang 7,927, Sorsogon na 5,584, Camarines Norte na mapakol sa 3,786, asin Catanduanes na 2,038.
An nasambitan man na voters’ registration an mapadagos hasta sa Agosto 10, 2025.
Enkaso man na dae madagos an Barangay and Sangguniang Kabataan elections sa bulan nin Disyembre, an komisyon an liwat na mapadagos kan registration sa October 2025.
Enot naman na pigsaysay ni Comelec Chair George Garcia na nakatalaan na tintaan ni Presidente Ferdinand Marcos Jr. sa Agosto 12 an sarong ley na nagsusugo na isagibo an Barangay and Sangguniang Kabataan Elections sa Nobyembre 2026.
