Pigreport kan Commission on Elections Bicol na nakapagsunad na sinda nin nasa 78 na reklamo sa irarom kan anti-vote-buying “Kontra Bigay” campaign asin nakapagpaluwas man nin nasa 42 na show-cause orders an komisyon katakod kan kakatapos pa sana na national and local elections.
Sigun ki Comelec-5 Director Ma. Juana Valeza na an saindang pinahigot na Kontra Bigay campaign an nagtataong halangkaw na kaaraman sa publiko dapit sa vote-buying.
Katakod kaini, an nasa 78 vote-buying complaints na saindang nairehistro an masairarom sa preliminary investigation kan Kontra Bigay Committee kan Comelec central office sa Manila.
An mga Subpoenas man an ipapaluwas sa mga respondents na kun saen pigre-require an mga ini na magsumiter kan saindang komento sa laog kan 15 aldaw dapit sa nasambitan ng reklamo.
Apwera digde, pigsaysay man ni Valeza na an 42 na indibidwal o grupo na nakareseber nin show-cause orders an padagos na pig-iimbestigaran.
An anuman na magugunong impormasyon o rekomendasyon an isusumiter sa Kontra Bigay Committee tanganing madetermina kun kaipuhan an pagsunad kan pormal na kaso.
Kumpyansa an opisyal na an komisyon maabot an halangkaw na conviction rate sa kadakol na reklamo.
Mientrastanto, pig-ako man ni Valeza an mga isyu na saindang nakahampang sa ginamit na automated counting machines (ACMs) alagad saindang pig-asigurar an publiko na naipautob an contingency measures tanganing maresolbaran an problema.
Sa ngunyan, dagos-dagos na nakatutok an Commission on Elections Bicol sa pagpapanimbag sa mga indibidwal na imbwelto sa vote-buying.
