NAGA CITY- Pigsierto ngonian kan Commission on Election (Comelec)-Camarines Sur na dagos-dagos na an ikukundusir na Barangay asin Sangguniang Kabataan (SK) Elections sa maabot na bulan nin Mayo.
Sa entrevista kan Bombo Radyo Naga ki Alex Marpuri, tagapagtaram kan Comelec-CamSur, sinaysay kaini na 99% na madadagos an nasambitan na eleksyon urog pa na mayo na man suboot nin nagko-kontra digdi.
Segun ki Marpuri, preparado na man sinda kun saen puon pa kan bulan nin Disyembre kan nakaaging taon, nagkaigwa na sinda nin timeline asin calendar of activities na pigsusunod tangani na masiertong magayon an kaluluwasan kan nasambitan nang eleksyon.
Mientrastanto, nangapodan man si Marpuri sa mga aspirante para sa mga posisyon sa Barangay asin SK na mag-preparar huli ta Abril 14 suboot mapuon election period asin tulos ining susundan kan saindang pagsumiter nin Certificate of Candidacy (COC).
Apwera digdi, liwat man na pinatanidan ni Marpuri na basado sa bagong ley, 15-30 anyos na an pwedeng magparehistro sa SK mantang 18-24 anyos man an edad para sa mga ma-kandidato.
Duwang beses man suboot na maboto para sa SK asin barangay eleksyon an mga may edad na 18 hasta 30-anyos.
