NAGA CITY- Kompyansa an Comission on Elections (Comelec) sa banwaan nin Bato, Camarines Sur na nasa marhay na kamugtakan an mga balota kan iturn-over ninda sa Sangguniang Panlalawigan kan Enero kan pigkondusir an retrieval kan mga ballot boxes para sa gigibuhong manual recount.
Ini katakod kan mga pahayag ni dating Senator Bongbong Marcos kun saen igwang mga balota suboot hale sa nasambitang lugar na basa asin dae na mapapakinabangan pa.
Sigon sa presenteng nagtutukaw na Comelec Officer kan nasambitang banwaan na si Alex Escape, “in good condition” suboot an mga balota kan ipinaluwas ninda ini kan Enero kun kaya mayo pa sindang ideya kun sain pig-laog an nasambitang mga balota na nagin rason para mabasa an mga ini.
Sa suway na entrevista kan Bombo Radyo Naga ki Atty. Vic Rodriguez, legal counsel asin tagapagtaram ni dating Sen. Marcos, sinaysay kaining yaon sinda kaidtong retrieval kan mga ballot boxes hale sa Camarines Sur, alagad dae suboot ninda nahiling an mismong mga laman kan ballot boxes kun kaya dae ninda aram kun haloy na ining basa.
Imposible man suboot an sinasabi kan lado ni Vice President Robredo na nabasa an mga balota kan nagtama an Bagyong Nina sa Camarines Sur huli ta haros duwang taon na an nakaagi kun kaya dapat na alang na ini ngunyan.
Sigon ki Rodriguez, palaisipan sa sainda ngonian kun tano asin papano nabasa an mga balota.
