NAGA CITY- Puspusan an mga pigsasagibong preparasyon kan Comelec Caramoan katakod kan nararaning 2025 National and Local Elections.
Sa entrevista kan Bombo Radyo Naga ki Dennis Gomez, Election Officer kan Comelec Caramoan, sinaysay kaini na nagpuon pa an saindang preparasyon kan nakalihis na taon makalihis an Voter Registration.
Sigun ki Gomez, tinipon soboot ninda an mga indibidwal na nagpapasabot na sinda an madalagan asin piglatag an mga panundon na pigpauto kan Comelec tanganing magin marhay asin desente an saindang pag-iikot oras na magpuon naman an campaign period.
Apwera digde, pigtipon man an mga mawot na magserbeng paratukdo sa eleskyon tanganing matawan nin enot na impormasyon sa saindang magigin trabaho.
Katakod kaini, nakatalaan na magsairarom sa training an electoral boards na pigbibilog kan nasa 186 na katawo kun saen kinababalihan ini kan chair person, pool clerk, members asin igwa pa soboot na support staff.
Dugang pa kan opisyal, ngunyan man na aldaw, nagpuon na man an training kan technical support kan Caramoan.
Mientrastanto, nagtitinir man na nasa green category an banwaan kan Caramoan asin pigsierto kan mga kapulisan na mayo man nairerehistro na nagbalgar sa gun ban na nag-iiral asin nagin marhay man soboot an saindang ginibong Oplan Baklas.
Sa ngunyan, hagad na sana ni Gomez an pakikipagtabangan kan gabos tanganing magin matuninong asin matrayumpo an ikukundusir na election.
