NAGA CITY- Naglalaom an Commission on Elections Goa sa probinsiya kan Camarines Sur na kusang babaklason nin kampo kan mga local candidates an saindang campaign materials na mayo sa common poster areas antes pa man an pagpupuon kan kampanya sa lokal na posisyon sa Marso 28, 2025.
Sigun sa komisyon matao sinda nin mga notice sa mga kandidato na nagdadalagan para sa local post.
Padagos an nasambitan ng pangapudan puon kan mag-arangkada an kampanya para sa national asin party list groups kun saen kadakol pa ma giraray an padagos na nagbabalgar sa panundon na enot nang piglatag kan Commission on Elections.
Sigun sa Comelec, kadakol sindang na-obserbaran na mga campaign posters na iligal na pigbugtak sa electric posts, government facilities, puon kan kahoy asin national highways na dae man pigtutugutan kan komisyon.
Marurumduman, antes pa an Oplan Baklas, an Comelec an nagppadara nin notices sa mga kandidato tanganing matawan an mga ini nin tsansa na kusang halion an mga posters.
Enkaso an mga kandidato an nabigong magsunod digde, an Comelec asin government agencies an mahali kaini asin pwede man patawan nin magkakanigong kapadusahan an siisay man na dae nagsunod.
Mientrastanto, sa ngunyan, pig-enkaminar man an mga botante na hilingon an sindang pangaran sa listahan na nakapaskil na sa Comelec tanganing maaraman an saindang voting precinct.
