NAGA CITY- Tulos na nakapagrehistro nin insidente nin pagbalgar sa Comprehensive Law on Firearms and Ammunition an mga kapulisan sa ciudad nin Naga kasabay kan enot na aldaw kan pagpapautob kan Nationwide Gun Ban kan Commission on Elections (COMELEC) kaugnay kan pagpuon na kan election period.
Sa entrevista kan Bombo Radyo Naga ki SPO2 Tobias Bongon, tagapagtaram kan Naga City Police Office (NCPO), sinaysay kaini na itinurn-over sa saindang hepatura an sarong caliber 22 na badil na ginamit suboot kan suspek na si Larry Trio, 37-anyos sa panunutok sa biktimang si Jaime Rivera, 42-anyos sa Barangay San Felipe.
Sigon ki Bongon, nag-iinuman sinda Rivera na barangay tanod sa lugar asin si Trio kan magkaigwa nin dae pagkakaintindihan sa pag-ultanan kan duwa.
Nagkua suboot nin caliber 22 na badil si Trio asin pigtutok ki Rivera.
Tulos man ining naagaw kan biktima asin itinurn-over sa pulisya mantang tulos man na nagdulag an suspetsado.
Dugang pa ni Bongon, kargado an badil nin sarong bala.
Mahahampang si Trio sa kasong pagbalgar sa RA 10591 o an Comprehensive Law on Firearms and Ammunition.
Mientrastanto, arestado man an sarong Elio Evasco, 40-anyos makalihis an pigkondusir na Oplan Sita kan mga kabuhan kan NCPO sa Sagrada Familia, Barangay Peñafrancia.
Ayon kay Bongon, nakuanan si Evasco nin balisong na nakasuksok sa saiyang tagiliran asin limang sachet nin pigtutubudang shabu.
Katakod kaini, nagpagirumdom man an opisyal na sakop kan Comelec gun ban an pagpapangalad sa pagdadara nin mga deadly weapons.
