NAGA CITY- All set na an Comelec-Iriga para sa nararaning 2025 midterm election sa Mayo 12.
Sa entrevista ka Bombo Radyo Naga ki Atty. Cinderella F. Ferreras Lozano, Election Officer ka Comelec-Iriga, sinaysay kaini na kakatapos palang an pigkundusir na testing asin sealing kan gagamiton na Automated Counting Machine kan nakalihis na aldaw.
An nasambitan ng lakdang an tanganing masierto na nasa marhay asin mayong dayaan na mangyayari sa mismong borotohan.
Sigun pa ki Lozano, hasta sa Mayo 10 na sana an pangangampanya kan mga kandidato kun kaya maikokonsederar nang pagbalgar sa nag-iiral na ley enkaso igwang manutaran na mga kandidato na nangangampanya pa maski sa Mayo 11 hasta 12.
Mientrastanto, mayo man soboot nairehistro na vote buying sa saindang lugar puon pa kan mag-arangkada an election kaya nagtitinir man na tuninong an saindang siyudad.
Sa ngunyan, padagos na pig-eenkaminar an publiko na likayan an mga pigkokonsederar na election offenses tanganing dae man mabugtak sa alanganin na sitwasyon.
