NAGA CITY- Liwat na pinagirumduman kan Commission on Elections Naga an mga kandidato na likayan na magpahiling sa mga pagdestrebwer nin ayuda kan Department of Social Welfare and Development.
Sigun ki Atty. Maico Julia Jr, Election Officer kan Comelec Naga ini makalihis na matawan kan Commission on Elections nin exemption gikan sa spending ban na kun saen pigsaysay na pwede nang ipagpadagos kan DSWD an saindang distribusyon kan Ayuda para sa Kapos an Kita Program o AKAP program asin iba pang programa ngunyan na panahon kan eleksyon.
Katakod kaini, nakapalaog man sa memorandum kan komisyon na tuyong igwang idedestrebwer na mga ayuda kinakaipuhan na yaon an presensiya kan mga election officer kan kada munisipalidad.
Apwera digde, ipinagbabawal man an mga kandidato sa mismong pagdestrebwer nin ayuda siringman piglinaw kan komisyon na dae saklaw kan exemption an spending ban na puon Mayo 2 hasta Mayo 12.
Paliwanag ni Julia, sa pagpuon kan campaign period sa local post sa maabot na Marso 28 bawal na sa venue an mga kandidato, taga suporta, incumbent officials pati pamilya ninda siringman an mga posters huli ta puwede ining maikonsiderar komo vote buying na saro sa mga election offence na igwang karampatang kapadusahan.
Kinakaipuhan soboot na malinaw ini para sa gabos bako sana sa mga kandidato tanganing malikayan an mga pagbalgar na posibleng magkriar nin kariribukan sa panahon kan eleksyon.
Sa ngunyan, dagos-dagos an preparasyon kan Comelec Naga para sa papaabuton na pagpuon kan campaign period sa lokal na posisyon partikular na an ikukundusir na Oplan Baklas.
