NAGA CITY- Padagos an pigsasagibong preparasyon kan mga personahe kan Commission on Election Naga para sa pagpuon kan election period sa masunod na taon.
Sigun ki Atty. Maico Julia Jr, Election Officer kan Comelec Naga, kasabay kan nasambitan ng aktibidad liwat na nagpaluwas nin pagirumdom an nasambitan ng opisina kan mga dapat na sunudon kan publiko.
Para sa lado kan mga motorista, liwat na pig-abisuhan an mga ini na magsunod sa mga pigpautob na panundunan orog na sa isasagibong manlaen-laen na Comelec Check Point katabang an Naga City Police Office tanganing malikayan an anuman na aksidente.
Siringman, liwat na inabisuhan kan opisyal an publiko orog na an mga maysadiri kan badil na siertuhon na rehistrado an mga ini antes na bitbiton sa luwas.
Marurumduman, enot naman nakipag-meeting an Comelec Naga sa PNP asin AFP katakod kan ipapautob na gun ban sa siyudad.
