NAGA CITY- Piglatag kan Comelec-Naga an Calendar of Activities para sa isasagibong 2026 Barangay asin Sangguniang Kabataan Elections.
Sa nagin paghampang sa mga kagawad kan media ni Atty. Maico Julia Jr, Election Officer kan Comelec-Naga, sinaysay kaini na an filing of certificate for candidacy an isasagibo sa September 28 hasta Oktubre 5, 2026 mantang an campaign period an pigtalaan sa maabot na Oktubre 22 hasta 31.
Siringman an election period mapuon sa Oktubre 3 hasta November 9 kan presenteng taon kun saen digde ipapautob an gun ban asin Comelec Checkpoint. Sigun pa ki Julia, nagpapadagos man an voters registration na nagpuon kan nakalihis na October 20 asin matapos sa Mayo 18, 2026.
Katakod digde, magkakaigwa nin satellite registration an Comelec-Naga sa nagkapira pang barangay sa siyudad nin Naga kun saen pupuonan sa aga, Pebrero 6 sa paagi kan special registration para sa mga PWD asin senior citizens na isasagibo sa sarong mall.
Apwera digde, yaon man an satellite registration; Pebrero 12 sa Barangay Pacol, Pebrero 13 sa Barangay Cararayan, Pebrero 19 sa Barangay Mabolo, Pebrero 20 sa Panicuason, Pebrero 26 sa Peñafrancia asin Pebrero 27 sa BJMP para sa mga PDLs.
Mientrastanto, pigheras man kan opisyal na nag-abot sa 9k an saindang pighali sa listahan huli sa bigong makaboto nin duwang consecutive elections.
Alagad an mga ini an liwat na pigsuratan na magpa-reactive tanganing makaboto ngunyan na maabot na Nobyembre 02, 2026. Sa ngunyan, nag-abot naman sa labi 3k an nagparehistro sa siyudad nin Naga sa nagpapadagos na voters registration.
