NAGA CITY-Dakula pa suboot an posibilidad na pirmahan na ni presidente Rodrigo Duterte an propwestong ley na nagpapauktaba kan barangay asin Sangguniang Kabataan (SK) elections dawa pormal ng nagpuon an election period.
Sa entrevista kan Bombo Radyo Naga ki Atty. Maico Julia, election officer kan Commission on Elections (COMELEC) Naga, sinaysay kaini na si presidente Duterte mismo an nagsugo sa Kongreso na ipauktaba an eleksyon ngonyang taon kaya nagtutubod siya na pipirmahan na kaini an naipasar na propwestong ley.
Hagad ngonyan ni Julia na mapirmahan na sa madaling panahon an nasambitang kasuguan para dae na suboot masakitan an saindang opisina sa preparasyon sa eleksyon siring man an mga nagpaplanong magkandidato asin magsunad kan saindang certificate of candidacy (COC) sa Comelec.
Napag-araman na mapuon sa Oktubre 5 hasta 11 an filling kan mga COC mantang mapuon man sa Oktubre 12 asin matapos sa Oktubre 21 an campaign period para sa barangay asin SK Elections.
Ikokondusir man sa Oktubre 23 an eleksyon enkaso dae pa mapirmahan ni presidente Duterte an propwestong ley na nagpapauktaba digdi.
