NAGA CITY- Preparado na an Comelec Ocampo para sa ikukundusir na voter’s registration sa maabot na August 1 hasta 10, 2025 para sa Barangay asin Sangguniang Kabataan Election. Ini an puon alas 8 nin aga hasta alas 5 nin hapon, Lunes hasta Domingo (magin sa holidays).
Sa entrevista kan Bombo Radyo Naga ki Milby Bihag, Election Officer kan Comelec-Ocampo, sinaysay kaini na saindang piglalaoman na kadakol an maparehistro orog na ta nagkaigwa soboot sinda nin pag-urulay kaibahan an mga punong Barangay kun saen dadarahon kan mga ini an saindang kanya-kanya man na aplikante.
Sigun pa sa opisyal kayang i-akomodar kan Comelec Ocampo an nasa labi 300 na registrant huli ta preparado sindang marhay.
Katakod kaini, liwat giraray na pigpapagirumdom an publiko na an mga minasunod na aplikasyon san an sulamenteng aakuon kan saindang opisina: Registration, Change of Name and Status, Correction of Entries, Reactivation of Registration Records, Inclusion of Registration Records and Reinstatement of Name in the List of Voters, Updating of Records of PWD, Senior Citizen, and members of IP and ICC, Transfer from Overseas to Local Only.
Para man sa Online Filing siring kan Reactivation, Reactivation with Change/Correction asin Reactivation with Updating of Records.
Mientrastanto, pinapagirumdom man na mayo an Transfer of Local Voting Address sa gigibuhong Voter’s Registration.
Mientrastanto, magkakaigwa man an Comelec Ocampo nin satellite registration para sa mga vulnerable sector siring kan mga Senior Citizen, Indigenous Peoples asi nPersons With Disability sa maabot na August 4.
Piglalaoman digde na makapagparehistro an nasa 50 hasta 70 na mga bulnerableng indibidwal.
Sa ngunyan, pig-enkaminar na sana kan opisyal an publiko na mag-avail kan saindang pigtatangro na serbisyo partikular an pagpaparehistro para sa isasagibong Barangay asin Sangguniang Kabataan Election.
