NAGA CITY- Preparado na an COMELEC-Ocampo para sa papaabuton na eleksyon ngunyan na taon.
Sa entrevista kan Bombo Radyo Naga ki Ann Grace Saliente, Acting Election Officer, kan COMELEC Ocampo, sinaysay kaini na an gabos na masirbing electoral board sa election, asin desk technical supports staff an nakapagtraining na, magin an mga kandidato an na-orient na kan nakalihis na Sabado, siringman an nasagibo na ninda an Unity Walk, candidates briefing asin peace covenant signing.
Nagsagibo man sinda nin meeting kaibanan an mga barangay kapitan.
Ngunyan man na aldaw, magkakaigwa nin final na certification asin an pagberipika kan listahan kan mga botante, kun saen nasa 30,473 an mga registered voters.
Katakod kaini, pigtawan-duon man kan opisyal na mas convenient an electoral machine na gagamiton ngunyan nin huli ta naggagana ini maski pa magkaigwa nin aberya sa supply kan kuryente.
Dugang pa digdi, sa pagpuon kan National Level Campaign, nagkaigwa man sinda nin Operation Baklas, kun saen nasa 6 sanang poster an saindang nabaklas. Mantang sa maabot na Marso 28, mapuon naman an kampanya kan mga local na kandidato, kun saen, isasagibo man an siringna operasyon.
Mientrastanto, kumpiyansa man an nasambitan ng opisyal na mayong magyayaring dayaan sa saindang banwaan sa maabot na eleksyon orog na ta nagsusunod man an mga kandidato sa saindang banwaan.
