NAGA CITY- Padagos an pigkukundusir na Voter’s Education asin Automated Counting Machine kan Comelec para sa nararaning midterm elections.
Sa nagin patara-tara ni Mark Christopher Ramirez, Comelec IT, sinaysay kaini na sa presente igwang nasa 68, 697, 596 registered voters nationwide para sa Mayo 12 na National asin Local Election.
Sa nasambitan ng numero, laog sa Top 5 an Bicol Region na igwang pinakadakol na botante na nagpapakol sa labi 4 milyon kun saen an Camarines Sur an igwang pinakadakol man sa gabos na probinsiya sa Bikol na nagpapakol sa nasa 1.3 milyon.
Sigun pa ki Ramirez, nag-abot man sa 37, 525 an mga voting centers nationwide. Ini an mga eskwelahan kun saen pigdudumanan tuyong eleksyon na makukua man an mga clusterd precint.
Sa kada presinto, igwang saro na ide-deploy na Automated Counting Machine an Comelec alagad igwang man standby na ACM kun kaipuhanon.
Para man sa mga ibobotong kandidato, dapat 12 na mga senators, sarong partylist asin an mga posisyon sa local na tama sana sa pighahagad.
Sa ngunyan, liwat na pinagirumduman kan opisyal an publiko na magsunod sa mga panundon na piglatag kan Comelec tanganing dae mabugtak sa alanganin na sitwasyon.
