Liwat na nagpagirumdom an Commission on Elections (COMELEC) sa publiko na samantalahon an pagbubukas nin voter registration para sa Barangay asin Sangguniang Kabataan Elections (BSKE) paglaog kan bulan nin Agosto.
Sigun sa poll body, bukas magpuon alas 8 nin pagkaaga hasta ala 5 nin pagkahapon an voter registration na ikakasa magpuon August 1 hasta August 10.
Magkakaigwa man nin Special Register Anywhere Program (SRAP) sa National Capital Region asin mga piling lugar sa Region III asin Region IV-A magpuon August 1-7, 2025.
An mga klase kan aplikasyon na aakuon an siring kan registration para sa first time voter, pagpaparibay nin pangaran asin status, correction of entries, reactivation kan registration records, inclusion sa registration records asin reinstatement o pagbabalik nin pangaran sa listahan kan botante, updating kan records kan PWD, Senior Citizens asin miyembro kan IP asin ICC, pagbabalyo gikan overseas komo local voter.
Laog man sa online filing an reactivation, reactivation with change/correction asin reactivation with updating of records.
Pigsierto pa man kan poll body na may priority lane sa voters registration para sa senior citizens, may mga kakundian asin mga bados.
