Pigtawan-duon ni Commission on Elections (COMELEC) Chairman George Erwin Garcia an importansiya kan pagsumiter asin masusing pag-aadal kan Statement of Contributions and Expenditures o SOCE kan gabos na kandidato- nanggana man o nadaog.
Sigun ki Garcia, importante ini orog na makalihis na mabunyag an nagkapirang isyu katakod kan campaign donations gikan sa mga kumpanyamg igwang kontrata sa gobyerno, partikularmente na sa mga flood control projects.
Marurumdumang kaibahan sa mga nabanggit na kontratista an Centerways Construction and Development Inc., na kinumpirmar ni Senate President Francis “Chiz” Escudero na nagtao nin kontribusyon sa saiyang kampanya kan nakalihis na 2022 elections.
Dugang pa ni Garcia na dati nakatuon sana an pansin kan publiko sa kun pira an ginastos kan sarong kandidato alagad ngunyan naghehewas na an interes kan mga botante tanganing maaraman man kun sairisay an nagtao nin donasyon.
Hurot pa ni Garcia na malinaw na pagbalgar sa Omnibus Election Code an pagresebir nin donasyon gikan sa mga kumpanyang igwang presenteng kontrata sa gobyerno.
Alagad maski dae pa aram kun kandidato o kontratista an maninimbag, pigsierto kaini na igwang kaakibat na criminal liability an sisay man na mapapatotoohang nagbalgar.An mga mapapatotoohang nagkasal kan election offense an pwedeng makulong nin saro hasta anom na taon.
Mientrastanto, malugod man na pig-ako ni Garcia an amay na pagsusunad nin petisyon kontra sa pagpapauktaba kan Barangay asin Sangguniang Kabataan Elections (BSKE) na soboot makakatabang tanganing tulos na mawara an agam-agam dapit sa ulayan.
Paliwanag ni Garcia, an amay na aksiyon an mataong dalan sa mas marekas na desisyom kun dapat na ipagpadagos o ipa-untok an pagpepreparar para sa eleksiyon.
Mas marhay soboot na maresolbaran tulos ini tanganing malinawan an gabos kan partido asin malikayan an pagkaantala kan mga plano kan COMELEC.
Marurumdumang kasuodma, kapwa nagsunad nin suhay na petisyon sa Korte Suprema an election lawyer na si Atty. Romulo Macalintal asin paratukdo na si John Barry Tayam na pigkokonsiderar na unconstitutional an pagpapauktaba sa BSKE.
Alagad maski pinirmahan na kan Presidente an ley na nagpapauktaba sa BSKE, padagos pa man an preparasyon kan COMELEC enkaso kuwestiyunon ini kan Korte Suprema asin madagos an eleksiyon sa Disyembre.
