NAGA CITY-Pinag-aadalan na kan Commission on Elections(Comelec) an pagsusunad nin election offence laban ki suspended Bamban, Tarlac Mayor Alice Guo huli sa paggamit nin pekeng impormasyon kan pigsunad kaini an saiyang kandidatura.
Segun ki Comelec Chairman George Garcia, an isusunad na election offense pwedeng ibase sa misrepresentation ni Guo sa saiyang COC kun saen pighihiling na kan komisyon an posibleng gagamiton nindang ebidensya.
Siring man, pigsambit ni Garcia na dai na pwedeng magsunad nin disqualification case laban ki Guo huli ta naenot na ining iproklamar komo nangganang kandidato asin pig-gampanan na kaini an saiyang posisyon. Duon kan opisyal, mayo na ini sa hurisdiksyon kan Comelec.
Mientrastanto kun madalagan man liwat an suspendidong alkalde, pwede na ining habulon kan komisyon, asin pwede ining mahampang sa disqualification.
Sa ibong na lado, pigsambit man kan Office of the Solicitor General(OSG) na posibleng sa sunod na bulan masunad na ini nin quo warranto petition laban ki Guo.
Ini kasunod na man kan naenot nang kumpirmasyon kan National Bureau of Investigation(NBI) na sarong tao sana sina Mayor Alice Guo asin Guo Hua Ping, basado sa pagkakaigwa ninda nin parehong fingerprints.
