Sinaysay kan Commission on Elections (COMELEC) na pinagkokomento sinda kan Malacañang dapit sa propwestong ley na nagpapalawig sa termino kan mga halal na opisyal kan Barangay asin Sangguniang Kabataan.
Sigun ki COMELEC Chairman George Erwin Garcia, nagpadara na man sinda nin simbag sa Office of the President.
Binisto kan poll body an lakdang na ini asin nagtutubod na mayo nang pwedeng idagdag an poll body apwera sa datos na naitao asin saidang posisyon dapit sa priowestong ley.
Naenot nang inaprubaran kan Senado asin Kamara an propwesto na obhetong palawigon an termino kan mga opisyal kan barangay asin SK gikan sa presenteng tulong taon, ini an magigin apat na taon.
Kun maisabatas ini, ililipat an Barangay asin Sangguniang Kabataan Elections (BSKE) magpuon priemorong aldaw kan Disyembre kan presenteng taon pasiring Nobyembre 2026.
Siringpaman, pigheras man ni Garcia na dagos-dagos pa man an preparasyon kan komisyon para sa BSKE kun madagos ini sa Disyembre .
Sigun sa saiya, isinasagibo na an procurement process para sa mga materyales sa eleksyon siring kan mga pansurat, papel, asin 68,000 na ballot boxes.
Saro man sa nabanggit ninda sa saindang sekretaryo iyo an pagkakaigwa nin halipot na panahon kan COMELEC huli sa preparasyon man para sa Bangsamoro Parliamentary Elections na sigurado man na madadagos ngunyan na bulan nin Oktubre.
