NAGA CITY- Pighihiling kan sarong opisyal kan DepEd-Camarines Sur na pwedeng itukdo an pigbubusol na prosopwestong Comprehensive Sexuality Education sa mga senior high school students.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-CamSur, sinaysay kaini na an mga edad kan nasa Senior High School an appropriate na tukduan kan nasambitan ng Comprehensive Sexuality Education nin huli ta maasabutan na kan mga ini nin marhay an dapit sa nasambitan ng isyu.
Sigun pa ki Pelingon, nakadepende sa DepEd kun anong kasuguan an saindang ii-implementar na susog man sa mandato kan gobierno o magkakanigong opisina.
Huli kaini, liwat na pig-enkaminar kan opisyal an mga magurang na pirmeng tawan nin giya an saindang mga kaakian dapit sa mga bagay-bagay na saindang dae pa nasasabutan.
Kaipuhan soboot ini tanganing dae malihis an pagdedesisyon kan mga jovenes asin saindang maaraman an responsibilidad bako sana para sa saindang mga sadiri kundi magin sa bilog na komunidad.
Sa ngunyan, pigsierto na sana ni Pelingon na padagos an paglalapigot kan DepEd-Camarines Sur tanganing matawan nin de kalidad na edukasyon an mga kaakian sa bilog na nasyon.
