NAGA CITY- Pinahimutikan ngonian kan sarong kongresista sa probinsya nin Camarines Sur an suboot paggamit kaini sa Emergency Shelter Assistance (ESA) gikan sa Department of Social Welfare and Development (DSWD) komo parte kan saindang amay na pangangampanya.
Ini an sinaysay ni Regional Director Arnel Garcia kan DSWD Region V sa eksklusibong entrevista kan Bombo Radyo Naga.
Segun ki Garcia, hinapot niya si Cong. Lray Villafuerte, 2nd District Representative kan probinsya nin Camarines Sur manungod sa suboot paggamit kaini sa pananao kan ESA sa mga apektadong residente sa mga banwaan nin Camaligan, Milaor, Goa asin Bombon komo parte kan saindang amay na pangangampanya.
Alagad segun suboot ki Villafuerte, aram niya an nakapalaman sa Memorandum of Agreement (MOA) na itinao kan DSWD manungod sa pagdi-distribuir kan ESA sa mga apektadong residente.
Sinaysay pa ni Garcia na dae man nakabugtak sa MOA na pigpapangalad an pagkakaigwa nin ibang programa kasabay kan pananao kan ESA sa mga residente.
An importane sana suboot maitao ini sa mga namamanwaan sa urog na marikas na panahon.
Mientrastanto, nangapodan na sana si Garcia sa mga kongresista, gobernador, alkalde asin iba pang opisyales kan gobyerno na dae nanggad paggamiton an mga programa kan DSWD sa amay na pangangampanya.
Pangapodan man kaini sa mga residente, urog na sa mga botante na kun en kaso makahiling sinda nin pagpapa “epal” sa mga opisyales, tulos man ining kuanan nin ladawan asin ipaabot sa saiyang opisina tanganing maipaabot sa tamang nanunungdan asin dagos nang mauntok an pang-aabuso kan nasambitan nang mga opisyal.
