Pigkwestyon kan sarong eksperto kan ley an presenteng dalagan kan impeachment trial, na naglilihis ini sa tunay na katuyuhan kan proseso sa irarom kan Konstitusyon. Ilinadawan niya ini bilang sarong “political theater” kun saen an pamumulitika asin kariribokan nangingibabaw sa seryosong pag-orolay sa mga isyung legal.
Sa intrevista kan Bombo Radyo Naga kay Atty. Michael Henry Yusingco, Constitutional law Expert, mas nagiging criminal trial an impeachment huli sa sobrang pagtutok sa mga technicalities asin mahigot na pag-aplikar kan rules of court. Dapat suboot na magdanay ining mekanismo para sa accountability kan mga opisyales imbes na magin contest of arguments sa laog kan korte.
Sa saiyang pag-analisar kan mga articles of impeachment, sinabi ni na igwa nin supisyenteng evidencia tanganing mapatunayan an mga insidente nin pananakot sa lindong kan Artikulo 4, alagad kaipuhan an mas malinaw na legal na koneksyon tanganing patunayan an pagtraydor sa tiwala kan publiko. Mientrastanto, mas makusog man suboot an Article 2 huli sa mga dokumento hali sa COA, AMLC, asin Ombudsman dapit sa suboot dae maipaliwanag na yaman asin salang paggamit kan pondo.
Sinambit man ni Yusingco an angat kan media sa pagreport kan impeachment trial huli sa soboot “circus” kan nagkapirang parte kan trial. Nadedepisilan suboot an publiko sa pagtutok sa mga ebidensya huli sas natatahoban ini kan mga kontrobersiya, mga pahayag, asin pagluwas sa publiko kan mga imbuelto.
Ipigproponer ni Yusingco na repormahon an proseso sa paagi nin pagbalik sa mas inquisitoryal na sistema, kun saen limitado an direktang paghapot kan mga senador asin an pagbista mas nakasentro sa paghanap kan katotoohan. Tinawang-duon kaini na dapat mantiniron an dignidad kan impeachment bilang sarong importanteng mekanismo nin paninimbagan kan gobyerno.
