NAGA CITY-Nairido an limang pulis na parte nin sarong joint medical mission makalihis na tambangan kan pigtutubudang mga miyembro kan rebeldeng New People’s Army (NPA) an convoy kan mga ini sa Barangay Mambulo Nuevo, Libmanan, Camarines Sur subagong hapon.
Binisto an mga nairido na sinda PO3 Roland G Hermogeno; PO1 Vladimir Guadalupe; PO1 Roy V Carbonell; PO1 Eliseo Jomar N Palaroan asin PO1 Daisy Bhel Genova
Sa nagunong impormasyon kan Bombo Radyo Naga, napag-araman na pasiring kuta na sa kasentrohan kan banwaan nin Libmanan an mga miyembros kan First Provincial Mobile Force Company kan Camarines Sur Police Provincial Office asin mga soldados kan 9th Infantry Division, Philippine Army hale sa sarong joint medical mission sa Barangay Bagamelon.
Mantang binabagtas suboot kan mga ini an kalabaan kan tinampo sa Sitio Patag sa nasambitang Barangay bandang alas-4:30 nin hapon kan bigla na sanang nagsabog an pigtutubudang improvised explosive device (IED) na sinundan nin putok kan badil na hale sa lado kan mga rebelde.
Tulos man nagbalos nin putok an mga otoridad na nagresulta sa pagdurulag kan mga pigtutubudang NPA.
Nagsapo nin lugad an limang mga PNP Personnel na tulos man na pigdalagan sa ospital.
Napag-araman na apwera sa mga soldados asin kapulisan, kabale man sa nasambitang joint medical mission an mga doktor hale sa Bicol Medical Center (BMC).
Sa ngonyan, nagpapadagos pa an pigkokondusir na pursuit operation kan pinagsarong pwersa kan PNP asin AFP para lapagon an nagdurulag na mga miyembros kan makakawalang grupo.
