NAGA CITY-Pigheras kan Council Executive an kagayunan kan pagigin miyembro kan Boy Scouts.
Sa entrevista kan Bombo Radyo Naga ki Enrique Besenio, Youth Development Officer III kan Boy Scouts Bicol Regional Coordination Office, sinaysay kaini na komo sarong miyembro kan Boy Scouts an sarong indibidwal an magkakaigwa nin pagkakataon tanganing makisalamuha sa ibang mga tawo orog na ta nagkakaigwa soboot nin International gathering an saindang lado.
Obheto kaini na ma-highlight an gabos na miyembros kan Boy Scouts na gikan sa manlaen-laen na parte kan kinaban.
Apwera digde, natatawan man nin tsansa an sarong miyembro na malibot an nasyon na mayong masyadong gastos o minsan an libredo pa huli ta ang Boy Scouts an nagbibisita sa manlaen-laen na parte kan Pilipinas.
Parte soboot ini kan katuyuhan na maeksperyensiyahan kan saindang mga miyembros an ginigibo kan mga Boy Scouts of the Philippines.
Apwera digde, preparado man sinda na magtukdo kan mga pangangaipuhan kan mga kaakian siring na sana kan swimming, basic life support, weilding siringman mga outdoor activities kun saen pigtutukdo an pagkriar nin temporaryong madadagusan, paghahanap nin pagkakan, gabos na surviving skills na dapat maaraman kan mga Boy Scouts.
Pigtawan duon ni Besenio na pigtatao soboot ninda an gabos na pangangaipuhan kan saindang mga miyembros depende sa saindang kamawotan.
Sa ngunyan, pig-enkaminar na sana kan opisyal an mga kalalakihan na magin parte kan Boy Scouts asin magtalubo na kaibahan sinda.
