NAGA CITY- Padagos an ginigibong lakdang asin mga programa kan Camarines Sur Police Provincial Office tanganing mapababa an krimen sa probinsiya.
Sigun ki PCOL Virgilio Olalia Jr, Provincial Director kan Camarines Sur Police Provincial Office , susog sa kasuguan kan halangkaw na opisina kan PNP, padagos na pigtutukan kan saindang lado an area na dakol an nairerehistrong krimen.
Obligasyon soboot kan Chief of Police na i-adjust an saiyang mga personnel depende sa pangangaipuhan kan lugar na nasasakupan kaini.
Boot sabihon, enkaso halangkaw an naikukurit na mga krimen, kaipuhan na dugangan man an deployment kan mga kapulisan sa area tanganing mamantinir an paz y orden.
Apwera digde, aktibo an force multiplier kan mga otoridad katabang an mga barangay tanod, barangay official na iyong maresponde enkaso igwang nairehistrong kariribukan o krimen sa saindang lugar.
Importante soboot an papel na piggagampanan kan mga nasa barangay tanganing dae na maglala pa an problema o sitwasyon.
Kaipuhan nahihiling asin namamatean an presensiya kan mga barangay tanod sa saindang lugar tanganing magirumduman kan mga tawo an saindang mga responsabilidad.
Sa ngunyan, pigsierto na sana kan opisyal na yaon an mga kapulisan asin preparadong magresponde sa anuman na klase kan emerhensiya o pangangaipuhan kan komunidad.
