Pigbuyagyag kan government contractor na si Pacifico “Curlee” Discaya II na nakadepende sa nakatukaw na presidente an hinahagad na porsyento kan kickback kan mga kongresista sa paagikan saindang “bag man” gikan sa mga kontraktor.
Ginibo ni Discaya an rebelasyon sa pagpapadagos kan imbestigasyon kan Senate Blue Ribbon Committee hearing sa maanomaliyang flood control projects kan nakalihis na Martes, Setyembre 23.
Sa binasang affidavit ni Curlee Discaya, inilahad kaining kan panahon ni yumaong dating Presidente Benigno “PNoy” Aquino III, nagpapakol sa 10% an kickback na inaapod soboot nindang “padulas” o an kwartang kinukua kan bag man gikan sa kontraktor.
Naglangkaw man ini sa 12% hasta 15% sa irarom ni dating Presidente Rodrigo Duterte.
Mantang dumoble pa ini sa 25% hasta sa 35% sa irarom kan presenteng administrasyon ni Presidente Ferdinand Marcos Jr.
Pigbuyagyag pa kan contractor na kun dae sinda nagtutugot sa siring na gibuhon, ginigibuhan soboot nin problema an saindang proyekto siring na sana kan mutual termination o kaya man sarong isyu sa right of way.
Apwerra pa digde, ginagamit man soboot tangani takuton sinda an pag-blacklist sa sainda sa laog kan sarong taon kun saen dae na sinda makakabali sa mga bidding, kaya man napipiritan na sana soboot sinda na magsunod.
