NAGA CITY – Nagkokondusir na ngunyan nin manlaen-laeng campaign an pamayuhan kan Cyber response team kan Camarines Sur asin Camarines Norte para sa sa nagdadangadang na Penafrancia Fiesta.
Sa entrevista kan Bombo Radyo Naga ki PLt. Angelo Babagay, Team leader kan Provincial Cyber Response Team, sinaysay kaini na an nasambitan ng mga kampanya an para sa mga mabisita sa syudad nin Naga para sa nasambitan ng selebrasyon orog na sa mga magpapa book kan mga iistaran durasyon kan saindang pagbisita sa syudad.
Pagirumdom kan opisyal na mas makakamarhay na padumanan muna sa mga kabisto ninda an mga boarding house, o hotel na nahiling ninda online antes na magpadara nin bayad tanganing malikayan na mabiktima nin scam.
Dugang pa ni Babagay, mas makakamarhay man na dae na pagtawan nin kwarta an mga namamalimos orog na sentro tanganing dae na maenganyar an mga ini na mamalimos pa, orog na ta an iba soboot sa mga ini an nagpapanggap sana na igwa nin kapansanan.
Maiikonsiderar man soboot an siring kaining gibo na porma kan scam asin pupwede sindang ireport sa mga otoridad asin enkaso mapatotoohan na sinda an nanloloko pupwede man sindang sunadan nin karampatang kaso.
Piglalaoman man na liwat na magpapautob nin signal jamming sa kasagsagan kan Traslacion tanganing malikayan an anuman na katibaadan o mga insidente na pupwedeng magkawsa nin panic sa mga makikisumaro sa aktibidad.
Sa ngunyan, pagirumdom na sana kan opisyal sa gabos na maatendir sa mga aktibidad katakod kan nasambitan ng kafiestahan an ipasiguro permi an mga gamit na bitbit tanganing malikayan na mabiktima nin mga mahabon.
