Padagos na nagdadakol an bilang kan mga rehistradong biktima nin Cybercrime sa Camarines Sur asin Ciudad nin Naga, kun saen an cyber libel asin online estafa an kabali sa mga parating pigrereklamo, partikularmente an mga ilegal na pautang na ginigibo sa paagi kan internet.
Sa intrevista kan Bombo radyo Naga ki PCPT. Angelo Babagay (Team Leader, Naga City, Camarines Sur Cyber Response Team), mas sopistikadong paagi nin pandadaya an ginagamit kan mga scammer na puwedeng konsideraron na modernong bersyon kan “budol-budol” alagad piggigibo na ngunyan sa digital na kinaban. Sa ibong kan mga seminar asin kampanya sa impormasyon kan mga pulis, dakul man giraray an nabiktima huli sa padagos na pagluwas kan mga bagong modus operandi.
An Cyber Response Team napapaatubang sa mga angat sa pag-imbestigar kan mga kaso huli sa mahigot na proseso sa irarom kan Data Privacy Act asin an pangangaipo na makakua nin warrant to disclose gikan sa korte tanganing mamidbid an mga nasa likod kan mga pekeng account. Dugang pa digdi an kakulangan nin mga kagamitan, na saro sanang forensic machine an ginagamit sa pag-analisar kan digital na ebidensya sa bilog na rehiyon.
Katakod kaini, nagpapadagos man an imbestigasyon sa mga soboot troll account na nagpapalakop nin salang impormasyon asin panraraot sa Naga City Mayor Leni Robredo. An Cyber Response Team nagkokondukta nin pag-profile sa Facebook asin pagpreserbar nin mga post bilang posibleng ebidensya para sa anuman na legal na aksyon.
Nangapudan an mga otoridad sa publiko na mas maging maingat sa paggamit kan internet asin dae magtiwala sa mga kaduda-duda na online transactions. Idinoon ninda an importansya kan kooperasyon kan mga biktima asin an pagpreserbar kan mga ebidensya tanganing mapanimbag an mga imbwelto sa Cybercrime.
