Temporaryong ipinagbawal kan gobyerno an pag-export nin preskong ube o purple yam tanganing maprotehiran an kakulangan kan nasyon sa mga materyales sa pagtanom asin maibitaran an paggamit kan ibang nasyon para sa saindang sadiring produksyon.
Nagpaluwas nin orden kan kabangaan kan Agosto na tulos na pigsuspinde an pagluwas kan preskong ube asin an mga materyales kaini sa pagtanom, sagkod sa ibang abiso.
Sigon ki Agriculture Secretary Francisco Tiu Laurel Jr., importante na papagdanayon sa Pilipinas an mga materyales sa pagtanom huli kulang na an saindang supply. Katuyuhan man kan lakdang na maprotehiran an nasyon laban sa posibleng kompetisyon kan ibang nasyon na posibleng maggamit nin lokal na ube bilang materyales sa produksyon.
Kasabay kaini, pigmanduan kan BPI an mga Plant Quarantine Stations na pumondo na sa pag-isyu nin phytosanitary certificates para sa mga kargamento kan preskong ube asin mga materyales kaini sa pagtanom. Kabali sa pagbabawal an ube na pig-eeksportar para sa pagkonsumo, pagtanom, asin pagsiyasat.
Mientrastanto, an Departament of Agriculture nagtagama nin P300-M para sa pagpakusog kan industriya nin ube pag-abot kan 2027. Kaiba sa mga plano an pagpadakol kan mga materyales sa pagtanom sa paagi nin tissue culture, community-based nurseries, asin iba pang teknolohiya tanganing madugangan an lokal na produksyon asin masimbagan an nagdadakulang pangangaipo sa ube.
