NAGA CITY-Plano kan Department of Agriculture(DA) na bawasan an pork import sa Pilipinas hasta sa 60,000 metriko tonelada ngunyan na taon.
Ini kasabay kan pagmamawot kan ahensya na mapakusog an local production kasunod na man kan pigsasagibong mga programa komo pagbuhay sa hog industry kan nasyon.
Basado sa plano kan DA, mawot kaining ribayan an sampulong porsyento gikan sa imported pork supply kan nasyon asin ipantapal igdi an domestic production o lokal na produksyon.
Ini katampad nin 60,000 metriko tonelada nin karne nin orig.
Sigun sa ahensya magagamit igdi an ₱2.1 billion na pondo para sa modified repopulation program.
Sa irarom kan pigbagong repopulation program kan ahensya, igwang tolong magkakaibang package na pwedeng pakinabangan kan mga paraoma sa nasyon.
Enot an pagpapatindog nin production farm na nagkakantidad nin ₱16.21 million asin may kapasidad nin 60 sow/inahin.
Panduwa an 30-sow level capacity production farm na nagkakantidad nin ₱10 million, mantang an pantolo an 30-sow multiplier farm na nagkakantidad man nin ₱10 million.
