Posibleng magbugtak nin maximum suggested retail price (MSRP) an Department of Agriculture para sa mga produktong orig sa mga mayor na merkado kun padagos na maglangkaw an presyo kaini.
Ini makalihis na magkondusir nin inspeksyon an mga opisyales kan ahensya sa mga merkado kun sain nahiling ninda an nagdadakulang gap sa presyo kan farm gate asin retail prices. Nasa pag-ultanan kan P220-P240/kilo an selling price kan ataman na urig mantang an retail price nasa P380-P420/kilo.
Segun ki Agriculture Secretary Francisco Tiu Laurel Jr., an setting kan MSRP sa mga siring na produkto iyo an paglikay sa pagganansya o overpricing sa mga merkado. Idinagdag pa ni Laurel na an saindang departamento mabugtak sana nin MSRP kun ini nahihiling pa man giraray komo sarong demand asin bakong ordinaryong mga margins kan mga retailers, halangkaw an posibilidad kan pag aunsyar kaini.
Sa ibong na lado, pighihiling kan mga paratinda an mga kaso nin African Swine Fever (ASF) sa nasyon komo rason kan padagos na paglangkaw kan presyo kan siring na mga produkto.
Tulos man na nagkontra si Laurel na an padagos na pagsiklab kan ASF an rason kan paglangkaw kan presyo kan mga pork products sa merkado.
Segun sa sekretaryo, nagpapadagos an saindang padagos na paghihinguha para sa epektibong pagbakuna sa mga apektadong lugar, kun kaya dae dapat mahadit an publiko. Sa ngunyan, mas hababa an bilang kan mga lugar na apektado kan ASF kumparar kan nakaaging taon.
Sa 200 na apektadong barangay, 133 pa sana an apektado basado sa latest update kan ahensya. Mientrastanto, sa bagay na ini, an ahensya nagpaplano na magrekomendar kan pag-aprobar kan sarong bakuna sa ASF gikan sa Vietnam para sa komersyal na paggamit ngunyan na taon tanganing dagusan nang matapos an mga isyu sa ASF magin sa bird flu.
