Nagtutubod si Bukidnon Rep. Jonathan Keith Flores na an dai pag-atubang sa pagdangog kan House Committee on Justice sa ibong kan pagtao nin oportunidad katumbas kan pagbalewala o “pag-waive” kan deretso na magsimbag sa mga alegasyon sa impeachment.
Ini may relasyon sa isyu kan due process sa impeachment proceedings laban ki Bise Presidente Sara Duterte.
Pig-eksplikar kan mambabatas na esensya kan due process iyo an pagtao nin oportunidad na madangog asin dae nakadepende kun gagamiton ini o dae kan respondent.
Piglinaw man ni Flores na an pagpaluwas kan subpoena bako para piriton an lado kan Bise Presidente, kundi para makakua nin mahalagang impormasyon hale sa mga indibidwal na pwedeng makatabang sa kaso.
Kabale sa mga pinasubpoena sinda Atty. Michael Poa asin nagkapirang opisyal hale sa Commission on Audit (COA) makalihis na magsuhestiyon an mga miembros kan komite, kabale si Congressman Antonio Tinio, na kaipuhan an saindang testimonya para sa nagpapadagos na imbestigasyon sa reklamo.
Sa ibong kaini, padagos na pigkukuwestyon kan kampo ni Duterte an legalidad kan proseso sa luwas kan komite mientras na pinipiling dae mag-atender sa mga nakaaging hearing.
