NAGA CITY – Dakulang katabangan soboot para sa publiko an dagos-dagos na pagkundusir kan Serbisyo Caravan kan Land Transportation Office.
Marurumduman, nagsagibo nin serbisyo caravan an LTO kaibahan an Philippine Information Agency asin an lokal na gobierno kan Calabanga kun saen nasa 33 attendees an naserbisyuhan sa Barangay, Burabod, Calabanga, Camarines Sur.
Sigun ki Grace Rojas, chief kan Land Transportation Office-Naga, nagkaigwa nin lecture an saindang lado dapit sa road safety, pagkua nin license, mga manlaen-laen na penalties na kakahampangon kan sarong motorista enkaso madakop na magbalgar sa pigpapautob na batas trapiko asin kadakol pang iba.
Katakod kaini, pigtawan duon kan opisyal na importante na igwang aram an publiko dapit sa mga manlaen-laen na requirements antes magbiyahe tangani man na malikayan na mabugtak sa alanganin na sitwasyon.
Sa ibong na lado man, igwa man iba pang mga ahensiya kan gobierno na saindang nakatabang sa nasambitan ng aktibidad siring kan Philippine Statistics Authority, Technical Education And Skills Development Authority (TESDA), Department of Trade and Industry, Department of Information and Communications Technology asin an DA.
Sa ngunyan, pigsierto na sana kan opisyal na yaon an saindang opisina tanganing magtabang sa gabos sa saindang mga kahaputan.
