NAGA CITY- Naglalaom an Department of Labor and Employment (DOLE) na kadakol na mga Bicolano an makakakua nin trabaho katakod kan saindang piglunsar na aktibidad na parte kan Labor Day celebration.
Segun ki DOLE Assistant Sec. Amuerfina Reyes, nag-abot sa 60 na mga employers an nagpartisipar sa saindang piglunsar na job fair asin an Trabaho Negosyo at Kabuhayan Caravan sa ciudad nin Naga.
Pig-opresir suboot digdi an 2,000 na mga trabaho sa Pilipinas asin an 3,000 na mga trabaho sa ibang nasyon.
Apwera man sa mga trabaho, pig-opresir man digdi an mga livelihood assistance programs sa tabang kan Department of Trade and Industry (DTI).
Katakod kaini, nagpagirumdom man si Reyes sa mga aplikante na dapat na tultolon an saindang magiging trabaho sa oras na maako sa sarong kompanya.
Mientrastanto, pigsierto man ni Reyes na dae nag-uuntok an saindang opisina sa paggibo nin mga maninigong lakdang para dagos ng mawara an kontrakwalisasyon o an ENDO.
Pig-orgolyo man ni Reyes na nagpaluwas na nin panibagong administrative order si Labor Sec. Silvestre Bello asin nakapalaman digdi an pagbale sa labor sector sa pag-inspeksyon asin assessment sa mga labor law compliance officers.
Kabale man digdi an pagmumukna nin mga regional audit inspection team asin an DOLE Clinic para sa mga employers asin mga empleyado.
