NAGA CITY– Gadan an sarong daraga makalihis aksidenteng makuryente nin electric wire kan Casureco II sa Zone 3 Barangay San Roque, Calabanga, Camarines Sur.
Binisto an biktima na si Rachelle Hubilla, 18-anyos.
Sa entrevista kan Bombo Radyo Naga sa ina kan biktima na si Divina Hubilla, sinaysay kaining kinukua kuta na ni Hubilla an mga isinablay na bado kan biglang maputol an live wire asin nahulog sa biktima na nagin rason kan saiyang pagkakakuryente.
Nagsapo nin matinding tama sa lawas an biktima kun kaya tulos ining nagadan.
Sigon ki Hubilla, labi an saiyang kamunduan huli ta kadakol pa kuta ng pangiturugan sa buhay an biktima alagad huli sa depresyon na naeksperyensyahan kaini paramientras munang nag-untok sa pag-klase.
Sa ngunian, tulos man pinakarhay kan Casureco II an nasambitan ng linya kan kuryente para malikayan na an nasambitan ng insidente.
