Susunadan na nin reklamong qualified trafficking an pigsibak na alkalde kan Bamban na si Alice Guo asin nagkapira pang indibidwal na inireklamo kan Presidential Anti-Organized Crime Commission (PAOCC) asin PNP-CIDG kan Hunyo.
Sigun ki Justice Undersecretary Nicholas Felix Ty, pusog an ebidensiyang nagduduon ki Guo sa kasong qualified trafficking huli sa bagong amyenda sa ley.
Aminado man si Ty na medyo nahaluyan an pagpapaluwas nin desisyon preliminary investigation huli sa pirang beses na pigpurbaran kan kampo ni Guo na i-delay ini.
Mientrastanto, nakatalaan man na isunad an ninda Guo sa masunod na semana sa korte sa Capas, Tarlac.
Naglalaom man an DOJ na magluluwas an korte sa Capas nin commitment order asin saka pa sana magkakasundo kun saen talaga ikukulong an pigsibak na alkalde.
Naghurot naman soboot sinda sa Supreme Court nin change of venue asin ibalyo an mga kaso digde sa Kalakhang Maynila.
Apwera ki Guo, 13 pa an kinasuhan kabali si Dennis Cunanan huli sa saindang kinaaraman sa pigsalakay na iligal na POGO sa Bamban kun saen naisalbar an ginatos na indibidwal na kadaklan an mga dayuhan.
