NAGA CITY- Arestado ang isang driver ng van matapos ang isinagawang buy bust operation sa Brgy. Balaogan, Bula Camarines Sur.
Kinilala ang suspek na si Sonny Balares, alyas Boy, 39-anyos residente ng Brgy Palsong, sa nasabing bayan.
Sa panayam ng Bombo Radyo Naga kay PCpl Cecelio Buendia, tagapagsalita ng Bula Municipal Police Station, sinabi nito na narekober sa suspek ang apat na piraso ng heat sealed transparent plastic sachet na naglalaman ng pinaghihinalaang shabu gayundin ang ginamit na buy bust money.
Sa inisyal na imbestigasyon ng mga otoridad, nabatid din na ang naturang suspek ay nagkokontrata sa mga mangingisda sa lugar.
Dagdag pa ng opisyal, inamin naman aniya ng suspek na maliban sa pagtutulak ng iligal na droga ay gumagamit rin ito ng nasabing pinagbabawal na gamot.
Samantala, napag-alaman na dati ng drug surrennderee si Balares na posibleng mula pa sa Maynila ang pinagkukunan nito ng iligal na droga.
Sa ngayon, nasa kustodiya na ng mga otoridad ang naturang suspek para sa karampatang disposiyon.
