Inamin kan kinatawan kan Interpol sa Pilipinas na mayong kaibahan si dating Presidente Rodrigo Duterte kan ibinaba na ini sa eroplano asin piglunad sa stretcher.
Nagpahayag nin kahaditan si Senator Christopher “Bong” Go sa isinagibong pagdangog sa Senado kun saen tinukoy kaini na kasunod kan pagkakakulong sa dating Presidente ay na-isolate ini, dae pigtugutan na ma-access kan saiyang personal doctors, asin man dae naitao an mga nagkakaniho na bulong para sa saiyang pigmamati.
Inamin ni Special Envoy on Transnational Crime Ambassador Markus Lacanilao na si Duterte na sana an solo na sinundo kan mga tauhan kan International Criminal Court (ICC) pag abot sa The Hague.
Dae na soboot sinda pigtugutan kan ICC na ibahan pa an dating Presidente hasta sa darahon ini sa saiyang detention facility.
Kan maihapot man ni Go kun pano an access sa medication kan dating Presidente kun mayo na ining kaibahan sa pagbaba sa eroplano, sinimbag ni Lacanilao na nakipag-ulat asin ipinaliwanag na sana kan personal nurse ni Duterte asin kan Philippine National Police (PNP) doctor an mga kaipuhan kaining bulong.
Dawa an mga ini soboot ay dae man pigtugutan na mag iba sa dating Presidente.
Pighurot ni Go na 27 an bulong na uru-aldaw kaipuhan inumon kan dating Presidente asin napag-araman kaini na hasta ngunyan ay dae pa man pinapainom ki Duterte an mga nasambitag bulong kaini dawa na duwang beses kam nagpadara nin mga bulong para sa kanya.
