Aram baya nindo mga ka-bombo na saro na ngunyang kakaibang underground boutique hotel an The Netty, na manunutaran sa tahaw kan St. Giles Road sa Oxford.
Bistado ini ngunyan komo saro sa mga pinakanatatanging madadagusan sa siyudad, alafad antes ini nagin hotel, saro ining pampublikong toilet na nag-operate in labi 100 taon.
Ipinatindog kan taong-1895 sa irarom kan pamamayo ni Queen Victoria, nagsirbi an lugar komo men’s public comfort room hasta sa dagusang isinarado kan nakalihis na taong-2008 huli sa mga nagkapirang isyu.
Makalihis an 11 taong pagkatiwangwang, liwat na binuhay an estruktura asin ginibong sarong boutique hotel na nagtatao nin kakaibang eksperyensiya sa mga bisita.
Ngunyan, an The Netty an igwang duwang unit sana na pig-uupahan sa kantidad na £170 (pigkakarkulong ₱13,380) kada banggi.
Alagad maski mayong reception, restaurant, o room service, igwang access an mga bisita sa sarong help line para sa anumang pangangaipuhan asin pigtatawan man sinda nin complimentary cocktail sa pag-abot.
Pigdadayo an hotel kan mga turistang naghahanap nin natatanging experiences, asin sa ibong kan limitadong pasilidad, nag-aangat ini huli sa makasaysayang pinaggikanan asin kakaibang konsepto.
