NAGA CITY– Ikinaugma ni Vice President Leni Robredo an resolusyon ninda Sen. Grace Poe asin Sen. Sonny Angara na obhetong ingkaminaron si Presidente Rodrigo Duterte na tawan nin onra si dating Sen. Miriam Defensor-Santiago kasabay kan pagrumdom kan saiyang death anniversary sa aga.
Sa entrevista kan Bombo Radyo Naga ki Vice President Robredo, sinaysay kaini na “deserving’ si Santiago sa Quezon Service Cross Award o an pinakahalangkaw na civil service award sa nasyon.
Sigon ki Robredo, kadakol an kinaputan na posisyon sa gobyerno kan dating senador kung kaya dakula man an nagin kontribusyon kaini sa nasyon.
Magigin ‘source of pride’ man soboot ini kan pamilya ni Santiago huli ta an pamilya an pinaka enot na nagsasakripisyo sa mga oras na mayo sa sainda an senadora huli ta mas pinipili kaini an saiyang trabaho.
Naglalaom man si Robredo na magsisirbi ining inspirasyon sa gabos na public servants sa bilog na nasyon.
Marurumduman na Setyembre 29 kan nakaaging taon kan magadan an pigmimirar komo ‘Iron Lady of Asia’ huli sa komplikasyon sa helang na lung cancer.
